ئيعجازى غەیبی قورئان

 

 

نوسینی: عبدالمجید الزندانی
وەرگێڕانی: خالد حسن علی

 

خودا نەبێت كەس غەیب نازانێت، قورئانی پیرۆز هەواڵی غەیبی زۆری داوە، كە دەبێتە بەڵگەیەك لەسەر قورئان كه لەلایەن خوداوەیە و موحەممەدیش كە ئەم قورئانەی گەیاندووە، پێغەمبەری خودایە(صلی الله علیه وسلم).

لەو هەواڵە غەیبیانە:

1- كاتێك فارسە ئاگر پەرستەكان بەسەر ڕۆمەكانی خاوەن پەیام لە فەلەستیندا سەركەوتن، كافرانی قوڕەیشی مەككە دڵیان خۆش بوو، هەڕەشەیان لە موسڵمانەكان دەكرد بەوەی كە سەرەنجامیان وەك ئەوان دەبێت، بەمەش موسڵمانەكان بێتاقەت بوون، هەتا خوای گەورە ئایەتی دابەزاند:

(ألم(1)غُلِبَتِ الرُّومُ(2)فِي أَدْنَى الأَرْضِ وَهُمْ مِنْ بَعْدِ غَلَبِهِمْ سَيَغْلِبُونَ(3)فِي بِضْعِ سِنِينَ لِلَّهِ الأَمْرُ مِنْ قَبْلُ وَمِنْ بَعْدُ وَيَوْمَئِذٍ يَفْرَحُ الْمُؤْمِنُونَ(4)بِنَصْرِ اللَّهِ يَنصُرُ مَنْ يَشَاءُ وَهُوَ الْعَزِيزُ الرَّحِيمُ(5)وَعْدَ اللَّهِ لا يُخْلِفُ اللَّهُ وَعْدَهُ وَلَكِنَّ أَكْثَرَ النَّاسِ لا يَعْلَمُونَ(6)

واته: ئەلیف لام میم، ڕۆمەكان بەدەستی فارسەكان شكێنران، لە نزمترین شوێنی زەویدا، بەڵام دوای شكستیان سەردەكەونەوە، لە كەمتر لە 10 ساڵدا، هەموو فەرمانێكی پێش ودوای ئەم شكستە بەدەست خوایە، و لەو ڕۆژەدا باوەڕداران بە سەركەوتنی خودا دڵخۆش دەبن، ئەوەی ئەو بیەوێت سەریدەخات، ئەو زاڵ و زۆر بەبەزەییە، ئەمە بەڵێنی خودایە و خودا لە بەڵێنی خۆی لانادات، بەڵام زۆربەی كەس نازانن.

كاتێك ئەم ئایەتانە دابەزی موسڵمانەكان چوون بەسەر كافراكاندا خوێندیانەوە، هەتا یەكێك لە كافرەكان بەرەو ڕووی ئەبوبەكر بووەوە و وتی ڕۆمەكان لەو ماوەیەی قورئان دایناوە كە لە (3 بۆ 9) ساڵە سەرناكەونەوە، وتی با گرەو بكەین، ئەبوبەكری لەبەر ئەوەی گرەو حەرام نەكرابوو قبوڵی كرد و پێغەمبەریش ڕێی پێدا، هەموو كافرەكان لەگەڵ ئەو كافرەی گرەوەكەی كرد وەستان و چاوەرێیان دەكرد، هەروەك هەمو موسڵمانان چاوەڕوانی هاتنە دی بەڵێنەكەی قورئان و گرەوەكەی ئەبوبەكر بوون، بەمەش پێغەمبەرایەتیەكەی موحەمەد كەوتە ژێر تاقیكردنەوەوە، چونكە قورئان هەواڵی سەركەوتنەوەی ڕۆمەكانی دا، لە كاتێكدا هیچ ئاماژە و بەڵگەیەك نەبوو كە ڕۆمەكان جارێ‌ تر سەردەكەونەوە، بەڵێنەكەیش ماوەیەكی كەمی دانابوو، كەمتر لە 10 ساڵ، دەقە قورئانیەكەیش بە شێوازێك هات كە هیچ تەئویل و واتای تری هەڵنەدەگرت چونكە فەرموی: ( وَعْدَ اللَّهِ لا يُخْلِفُ اللَّهُ وَعْدَهُ) واته: ئەمە بەڵێنی خودایەو خودا لە بەڵێنی خۆی لانادات.
كافرەكان دەیانزانی پێغەمبەر ژیرترین كەسە و ئەگەر متمانەی تەواوی بە خوای خۆی نەبێت هەرگیز دینەكەی ناخەتە ژێر تاقیكردنەوەی لەو جۆرەوە، لە كۆتایدا نۆ ساڵەكە تەواو نەبوو، بەڵێنی خودا هاتە دی و ڕاستگۆیی پێغەمبەر دەركەوت، بەوەیش خەڵكێكی زۆر موسڵمان بوون و هاتنە ئاینی خوداوە.

2- هەوڵەكان بۆ تیرۆر كردنی پێغەمبەر (صلی الله علیه وسلم) لە ڕێگەی جەنگ و لە ڕێگەی پیلان دانان لە لایەن هاوبەش پەیدا كەران و جولەكەكانه وه  زۆر بوون، لەگەڵ ئەوەیشدا قورئان دابەزی و بەڵێنی بە پێغەمبەر (صلی الله علیه وسلم) دا، كە دوژمنەكانی دەستیان پێی ناگات، فەرموی:

(ياأيها الرسول بلغ ما أنزل إليك من ربك وإن لم تفعل فما بلغت رسالته والله يعصمك من الناس إن الله لا يهدي القوم الكافرين)

واته: ئه‌ی پێغه‌مبه‌رو فرستاده‌، هه‌رچی فه‌رمان و په‌یامێکت بۆ دابه‌زیووه له‌لایه‌ن په‌روه‌ردگارته‌وه (بێ دوودڵی، بێ ماتڵی) ڕای بگه‌یه‌نه‌، خۆ ئه‌گه‌ر به‌و کاره هه‌ڵنه‌سایت، ئه‌وه مانای وایه په‌یامه‌که‌یت (به‌ته‌واویی) نه‌گه‌یاندووه (دڵنیاش به که‌) خوا ده‌تپارێزێت له خه‌ڵکی، به‌ڕاستی خوا هیدایه‌ت و ڕێنموویی قه‌وم و هۆزی بێ باوه‌ڕان نادات.
لەدوای دابەزینی ئەم ئایەتە پێغەمبەر فەرمانی كرد بەو هاوەڵانەى پاسەوانیان دەكرد، فەرموی: ئەی ئەی خەڵكینە بڕۆن ئیتر پاسەوانیم مەكەن چونكە خوا دەمپارێزێت.
پیلانەكان زۆر بوون بەڵام خودا بۆ هینانەدی بەڵێنەكەی، هەمویانی پوچەڵ كردەوە، ئاشكرایە دوای پێغەمبەر سیان لە چوار خەلیفەكە شەهید كران، هەرچەندە لەو كاتەدا ئیسلامیش بەهێزتر و كافران دوو خرابونەوە و ئاسایش بەرپابوبوو، كە لەسەردەمی پێغەمبەر دا بەو جۆرە ئاسایش دەستەبەر نەبوو، بەڵام بەرگری خودایی پێغەمبەری ڕزگار كرد و، هەتا دواین ساتی لە بانگەواز بەردەوام بوو و پاسەوانەكانیشی ئیزندابوو لە كۆتایشدا بەڵینی خودا هاتە دی.

3- پێغەمبەران لەسەر زەویدا بەردەوام بە دوای یەكدا دەهاتن، بەڵام كە پێغەمبەر موحەممەد( صلی الله علیه وسلم) دەركەوت، هاتنی پێغەمبەران وەستا، ئەوەش بۆ ڕاستگۆیی فەرمودەی خودا :

(ما كان محمد أبا أحد من رجالكم ولكن رسول الله وخاتم النبيين وكان الله بكل شيء عليما) الاحزاب 40

واتە: محمد وەنەبێت باوکی هیچ که‌س له پیاوانتان بێت به‌ڵکو پێغه‌مبه‌ری خوایه‌ و دواهه‌مینی پێغه‌مبه‌رانه‌، هه‌میشه ‌و به‌رده‌وامیش خوا به هه‌موو شتێک زانایه.
ئەمە هەواڵێكی نادیار و غەیبیە و سەدەكانی دوای پێغەمبەر (صلی الله علیه وسلم) ڕاستیەكەیان سەلماندووە و شایەتی دەدەن هیچ پێغەمبەرێكی تر دوای ئەو نایەت.