هەندێك لە ئیعجازی قورئان و سوننەت

ئیعجازی ژمارەیی لە قورئاندا:

خوای گەورە كە فەرمویەتی: [اللَّهُ الَّذِي أَنزَلَ الْكِتَابَ بِالْحَقِّ وَالْمِيزَانَ] (الشوری17), ئەگەر ڕاڤەكارانی پێشو بە باشی لە ووشەی (بِالْحَقِّ) گەیشتبن، ئەوا زۆر سەریان سوڕماوە دەربارەی (ۆالْمِیزَانَ) واتە بە تەرازوو!! ئاخۆ پەیوەندی قورئان چییە بەو تەرازووەوە؟
بەڵام كاتێك سەردەم بووە سەردەمی كۆمپیوتەر و ئینتەرنێت و شۆڕشی زانیارییەكان، بــــــەشێك لــــــە نهێنییەكانی ئەو (ۆالْمِیزَانَ)ـە دەركەوت, كـــــە ئەویش تەرازوو بەندی سوورەت و ئایەت و ووشەو پیتەكانی ئایەتی قورئانە, كە هەر هەموویان وابەستەی ڕێك وپێكییەك و ڕێكخستنێكی ژمارەیی زۆر ووردن.
كە لەوانەیە مەبەستی خوای بەتوانا لە (ۆالْمِیزَانَ) ئەوە بێت, و خواش دەزانێت لەوانەیە ئەو ووشەیە زۆر نهێنی دیكە لەخۆی بگرێت كە لە دوا ڕۆژدا هەندێكی دیكەی لێ‌ بدۆزرێتەوە.
با پێكەوە سەیری ئەم خشتەیەی خوارەوە بكەین و سەرنجی ئەو جوانسازیەی ژمارەكان بكەین لە قورئاندا

تابلۆیەكی قەشەنگ:
ووشەی (البحار) واتە دەریاكان لە قورئانی پیرۆزدا (32) جار هاتووە, و ووشەی (البَرّ) واتە ووشكانی (13) جار هاتووە، كە كۆی هەردوو ووشەكە (32+13) دەكاتە (45)، خۆ ئەگەر ڕێژەی سەدی (البحار) وەربگرین و هەروەها ڕێژەی سەدی (البَرّ), ئەوا بەم جۆرە دەبن:
– بۆ (البحار): 45/32 ×100 =71,1111111% .
– بۆ (البَرّ): 45/13 ×100 = 28,8888889% .
ئەو ڕێژانەی سەرەوەش كە ڕێژەی ئاو و ووشكانین لە سەر گۆی زەوی, هەموویان ئەو ڕێژانەن كە زانستی نوێ‌ پێ‌ی گەیشتووە……

هاوكێشەیەك بۆ گۆڕینی ساڵی كۆچیبۆ زایینی و بە پێچەوانەوە:
لەبەر ئەوەی تێكڕای كۆی رۆژەكانی ساڵێكی زایینی (366) ڕۆژە, و تێكڕای كۆی رۆژەكانی ساڵێكی كۆچی (355) ڕۆژە، كەواتە یەك ساڵی زایینی دەكاتە (355/366 = 1,031 (بەنزیكی))، هەروەها یەك ساڵی كۆچی دەكاتە (366/355 = 0,969(بەنزیكی))، و لەبەر ئەوەی ساڵی كۆچی لە ساڵی (622)ی زایینییەوە دەست پێدەكات بۆیە دەتوانین بەم هاوكێشەی خوارەوە هەریەك لەو ساڵانە بگۆڕین بۆ بەرامبەرەكانیان:-
ساڵی زایینی = 0,969× (ساڵی كۆچی + 622).
ساڵی كۆچی =1,031× (ساڵی زایینی-622).
تابلۆیەكی دیكەی قەشەنگ:
خوای گەورە لە سوورەتی (الكهف)دا كە باس لە هاوەڵانی ئەشكەوت دەكات و دەفەرموێت: [وَلَبِثُوا فِي كَهْفِهِمْ ثَلَاثَ مِائَةٍ سِنِينَ وَازْدَادُوا تِسْعًا {25}] واتە: یارانی ئەشكەوت سێ‌ سەد ساڵی تەواوی (هەتاوی) لە ئەشكەوتەكەیاندا مانەوە و نۆ دانە ساڵی تریشیان خستە سەر, باشە خوا بۆ نافەرموێت بەتەنها (ثَلَاثَ مِائَةٍ سِنِينَ), و بۆ ئەو (وَازْدَادُوا تِسْعًا)ی بۆ زیاد كردووە ..!؟
بابەتەكە پەیوەندی هەیە بە ساڵی خۆری و ساڵی مانگییەوە، و قورئان ئاماژەكەی بە ساڵی مانگییە، ئەگەر تێكڕای كۆی ژمارەی ڕۆژەكانی ساڵی خۆری (زایینی) بە (366) ڕۆژ دابنێین, و ئەوە بدەین لە 300 ئەنجام دەكاتە ( 109800)، و ئەگەر تێكڕایی كۆی ژمارەی ڕۆژەكانی ساڵی مانگی بە (355) ڕۆژ دابنێین، خۆ ئەگەر ئەوەمان دا لە (300) ئەوا ئەنجام دەكاتە (106500) ڕۆژ، ئینجا ژمارەی ڕۆژەكانی ساڵی مانگی لە ژمارەی ڕۆژەكانی ساڵی ڕۆژی (زایینی) دەردەكەین (109800 – 106500 = 3300 ڕۆژ), ئەگەر ئەم ئەنجامە دابەشی (366)ی بكەین ئەوا ئەنجامەكە بە تەواوی (9) ساڵ دەكات، بۆیە مانەوەی هاوەڵانی ئەشكەوت لە ئەشكەوتەكەیاندا بە ساڵی زاینی (300) ساڵە و بە ساڵی مانگی (309) ساڵە..!!
ئاوی زەمزەم:

ئاوی زەمزەم ئاوێكی جیاوازە لە ئاوەكانی دیكە, ئاوێكی سەرسوڕهێنەرە لە هەزاران ساڵ پێش ئێستاوە هەر ماوە و ووشك نابێت، لە كاتێكدا كەم سەرچاوەی ئاویی و كانیاو و كارێز هەن كە بۆ چەند ساڵێك بمێننەوە…
تیمێك لە توێژەرەوە پاكستانییەكان هەستان بە لێكۆڵینەوەیەك لەسەر ئەو ئاوە و بۆیان دەركەوت كە بەڕاستی ئەو ئاوە جیاوازە لە ئاوی ئاسایی، هەروەها (ناوەندی توێژینەوەكانی حەج بۆ لێكۆڵینەوە لەئاوی زەمزەم) لە سعودیە بە هەمان ئەنجام گەیشتن، ئەندازیار (سامی عنقاوی) سەرۆكی ئەو ناوەندە ووتی: لە كاتێكدا ئێمە سەرگەرمی چاكسازی بووین لە سەرچاوەی ئاوی زەمزەم بە مەبەستی گەورەكردن و فراوان كردنی، هەرچەندە ئاوەكەمان لادەبرد و دوور دەخستەوە ئەوەندە و زیاتر ئاوی دی دەهاتەوە جێگای و ئەو ناوەی پڕ دەكردەوە…
ئینجا دەڵێت سێ‌ ترومپامان بەكارهێنا بۆ لابردنی ئاوەكەی, تا بوارمان هەبێت و بناغەكان چەسپ بكەین، لە پاشدا پشكنینمان كرد بۆ ئاوی زەمزەم و دەركەوت كە هیچ جۆرە میكرۆبێكی تێدا نییە و زۆر پاكژە، مەگەر ئەو قاپ و دۆلكە و پەرداخە پیسی بكەن، ئەوەش یەكێكە لە سیفەتە ناوازەكانی ئەو ئاوە…
سیفەتێكی دیكەی ئەو ئاوە كە زۆر سەیرە ئەو زۆری و بەردەوامیە و كەم نەكردنەیەتی كە لە هیچ ئاوێكی دیكەدا نییە و هەرچەندە لێ‌ی بەكار بهێنرێت ئەو ئەوەندە زیاد دەكات, جگە لەوەی كە لە زۆر مێژەوە ئەو ئاوە هەر هەیە و ووشك ناكات!!
من بۆ خۆم ئەزموونێكی كرداریم هەیە لەگەڵ ئاوی زەمزەمدا، چەند ساڵێك پێش ئێستا مامۆستا بووم لە یەكێك لە شارۆچكە نزیكەكانی شاری سلێمانی، كات (دوو تا سێ‌) مانگ بەسەر وەرزی حەجدا تێپەری بوو، ئێوارەیەكیان من و برادەرێكم دەعوەت بووین لە ماڵی ئاشنایەكمان، خێزانی ئەو ماڵە ئەو ساڵە حەجی كرد بوو, واتە سێ‌ مانگ پێش ئەوكاتە، بۆیە ئاوی زەمزەم لە ماڵیاندا هەبوو و سەروو پیاڵەی بۆ هێناین بیخۆینەوە، برأدەرەكەم ووتی من ئەوە ناخۆمەوە چونكە دوو یان سێ‌ مانگی بەسەردا تێپەڕیوە و خراپ بووە، منیش ووتم: ئاوی زەمزەم هەرگیز پیس نابێت و من خواردمەوە و هیچیشم بە سەر نەهات.
ئینجا نموونەیەكمان لەو ئاوە وەرگرت و بردمان بۆ خوێندگاكەمان كە دواناوەندی بوو, و ووردبینێكی ئاڵۆزی چاكی تیابوو، ئەو نموونە ئاوەی زەمزەم و نموونەی ئاوێكی ئاساییمان بۆ چەند ڕۆژێك دانا، ئینجا بە هۆی ووردبینەكەوە هەردوو ئاوەكەمان پشكنی، و بینیمان كە ئاوە ئاسایییەكە پیس بووە و شتمان تێدا بەدی دەكرد، بەڵام ئاوی زەمزەمەكە لە ڕوون رونتر بوو و هیچ شتێكی تێدا بەدی نەكرا.!! ئینجا برادەرەكەم بەو ڕاستییە قایل بوو.
پێغەمبەری ئیسلام (صلی الله عليه وسلم ) دەفەرموێت: [ماءُ زَمْزَم لِما شُرِبَ لَه، إِن شَرِبْتَهُ تَسْتَشفي شَفَاكَ الله، وَإِن شَرِبْتَهُ لِشَبعك أَشْبعك الله, وَإِن شَرِبْتَهُ لِقَطْعِ ظَمَئِكَ قَطَعَه الله …. تا دوایی فەرمودەكە] الدارقطنی و الحاكم گێڕاویانەتەوە, واتــــە: ئاوی زەمزەم دەخورێتەوە بۆ ئـــــەو مەبەستەی بۆی دەخۆیتەوە، ئەگـــــــەر خواردتەوە بـــــــــە مــــــەبەستی چارەسەركردن ئــــەوا خودا چــــاكت دەكاتەوە، و ئەگەر خواردتەوە بە مەبەستی تێربوون ئەوا خوا تێرت دەكات، و ئەگەر خواردتەوە بە مەبەستی تینوێتی شكاندنت ئەوا خوا هەرگیز تینووت ناكات، واتە مەرجە ئەو كەسەی ئاوی زەمزەم دەخواتەوە بۆ هەر مەبەستێك بێت دەبێت بڕوای (یقین) هەبێت بەوەی كە ئەو ئاوە بۆ ئەو مەبەستە دەبێت ئەگینا خواستەكەی جێ‌بەجێ‌ نابێت، واتە دەبێت مەرجی وەڵامــــدانەوەی خـــــوای گــــەورەی تێدا بێت بۆی, وەك خوا دەفەرموێت: [وَإِذَا سَأَلَكَ عِبَادِي عَنِّي فَإِنِّي قَرِيبٌ أُجِيبُ دَعْوَةَ الدَّاعِ إِذَا دَعَـانِ فَلْيَسْتَجِيبُواْ لِي وَلْيُؤْمِنُواْ بِي لَعَلَّهُـمْ يَرْشُدُونَ] (البقرە 186).
نموونە زۆرە لەسەر ئەوەی كە چەندین كەسی نەخۆش بە نەخۆشی جۆراو جۆری وەك: نەخۆشییەكانی چــــــاو و نەخۆشیەكـــــانی هەنـــــــاو و كۆئەندامی دەردان و زۆری دیكە چارەسەر كراون بەهۆی ئەو ئاوی زەمزەمەوە، بۆ نموونە ئافرەتێك بــــــــە ناوی (یسریە)یەوە كە چاوی چەپی توشی هەوكردنێك دەبێت لە ئەنجامی سەرئێشەیەكی تایبەتییەوە، پاش ئەوەی هەموو نوژدارەكان بێ‌ هیوا دەبن لــــــە چارەسەركردنی، (یسریە) گەشتێك دەكات بە مەبەستی عەمرە بۆ ماڵی خوا و عەمرەكەی دەكات و بە ئاوی زەمزەم چاوەكانی دەشوات و دەگەرێتەوە ئوتێلەكەی خۆی، زۆر سەیر دەبێت بەلایەوە كە دەبینێت ئەو چاوە نەخۆشەی چەپی بە تەواوی چاك بۆتەوە هەروەك چاوە ساغەكەی…
ئەوچاوە نەخۆشەی زۆر بە تەواوی كز بوو بوو بەڵام وائیستا بەتەواوی دەبینێت…
نموونەیەكی دیكە بەسەر دكتۆر (فاروق عەنتەر)دا هاتبوو, كە وەك خۆی دەڵێت چەند ساڵێك لەمەوبەر تووشی بەرد هاتم لە ڕێڕەوەكانی میزمدا, نوژدارەكان ئامۆژگارییان دەكردم كە هەر دەبێت بە كرداری نەشتەرگەری ڕزگارت ببێت، بەڵام من (وەك دكتۆر دەڵێت) هەر ئەو نەشتەرگەرییەم دواخست…
هەتا دكتۆر گەشتێك دەكات بۆ مەككەی پیرۆز و لەوێ‌ لە ئاوی زەمزەم دەخواتەوە, و دوو ڕكات نوێژ دەكات, و بەردە ڕەشەكە (الحجر اڵاسود) ماچ دەكات, ئینجا دەڵێت لەو كاتەدا هــــەستم دەكرد شتێك لــــە ناو سكمدا دادەخزێتــــە خوارەوە، خێرا چوومە سەر ئاو و خۆم خاڵی كردەوە و دەبینم بەردی گەورە گەورە دێنە دەرەوە، الله اكبر…. سبحان الله ئەوانە چین خۆ ئیتر من بەرد لە ناو ڕێڕەوە میزەكانمدا نەما، سوپاس بۆ خوا…
ئەوە زۆر سەرنجی نوژدارە تایبەتییەكانی دكتۆری ڕاكێشا, كە پێشتر ئاگاداری باری دروستی دكتۆر فارووق بوون, وا ئێستاش بەبێ‌ هیچ كردارێكی نەشتەرگەری ئەو ڕزگاری بووە.
بە ڕاستی نموونەی دیكە زۆرە لە سەر گرنگی ئەو ئاوەی زەمزەم, كە جیای دەكاتەوە لە ئاوی ئاسایی, كە لە هەمویان گرنگتر ئەو توانا زۆرە چــارەسەرییەی كە هەیەتی بە ئەمری خوا, بە مەرجێك بە تەواوی بڕواوە بەكاری بهێنیت.
سەرچاوەكان:
(1) سایتەكانی ئینتەر نێت:
www.hajiabbas.org
www.alsaha.com
www.answer.com
(2) الإعجاز العلمی فی القران/ د. طارق السویدان.
(3) الإعجــــاز العلمی فـی الإســــلام والسـنــــە النبویــــــــە/ محمد كامل عبد الصمد.

ئه‌م بابه‌ته‌ له‌ ماره‌ ٩ ی گۆڤاری هه‌يڤ بڵاو كراوه‌ته‌وه‌