كتێبی: (إِنَّهُ الحَقّ)

لەبڵاوكراوەكانی: دەستەی ئیعجازی زانستی لەقورئان و سوننەتدا لە (رابیتەی جیهانی ئیسلامی) لە مەككەی پیرۆز

دەستەی ئیعجازی زانستی چاپێكی نوێ‌ی كتێبی (إنە الحق)ی بە وێنەی تازەوە خستە بەردیدی خوێنەران، ئەم كتێبەش قەبارەی بچووكە و (126)لاپەڕەی لەخۆ گرتووە، چواردە دیمانەی تێدایە لەگەڵ زانا گەردونناسەكان و پێشەنگەكانی زانستی هاوچەرخ لەبوارە جیاجیاكاندا، مەبەست لەم دیمانانەش دەرخستنی ئەو راستییە زانستییانەن كە هەندێك ئایەتی قورئان و فەرموودەی پێغەمبەر (صلى الله عليه وسلم) ئاماژەی بۆ كردون، لەگەڵ روونكردنەوەی ئەوەی كە ئاینی ئیسلام هەمیشە هانی زانست و زانیاری داوە و هیچ ناتەبایییەكیش لە نێوان سرووشت ‌و راستییە تاقیگەیییەكانی زانستدا نییە.
ئەو زانایانەش كە دیمانەكانیان لەگەڵداكراوە موسڵمان نەبوون، پاش لێكۆڵینەوە و توێژینەوە بەچەند راستیەكی زانستی گەشتوون، پاش ئەوەی كە ئاگادار كران ئەو راستییانەی ئەوان پێ‌یگەشتوون یان بە ئاشكرا یان بە ئاماژە لە قورئانی پیرۆزدا زیاتر لە هەزاروچوار سەد ساڵ لەوەوپێش باسیان لێوە كراوە، هەر یەكەیان بە جۆرێكی جیاواز سەرسامیی خۆی دەربڕیوە، بەڵام هەموویان لەسەر ئەوە كۆكن كە ئەم قورئانە لەلایەن ئادەمیزادەوە دانەنراوە، تەنانەت زانای وایان تێدایە بە ڕاشكاوی دانی بەوەدا ناوە كە محمد(صلى الله عليه وسلم) ڕەوانە كراوی خوایە، هەشیانە شایەتومانی هێناوە و دانی بە تەنهایی خوا و پێغەمبەرێـتی محمد(صلى الله عليه وسلم) و راستی قورئان ناوە، بەوە هیچ قسەیەكیان نەهێشتوەتەوە نەك بۆ ئەوانەی كە لە خۆیان كەمترن لەئاستی زانستیدا بەڵكو بۆ ئەوانەشی كە لە پلەوپایەی زانستی خۆیاندان، چونكە دەرگا داخراوەكانیان بۆ دەكەنەوە و ڕێگایان بۆ خۆش دەكەن بۆ ئەوەی باوەڕ بە پەروەردگاری جیهان بهێنن، بەوەش قسەی بێ‌ باوەڕان لەبارەی ئیمان و نەبوونی بەڵگەی روون لەو بارەیەوە پووچەڵ دەكەنەوە…
ئەمانەش دیمانەكانی كتێبەكەن:
دیمانەی یەكەم: لەبارەی قۆناغەكانی كۆرپەلە و دروستبوونی ئادەمیزادەوەیە لەگەڵ پرۆفیسۆر (كیث مۆر) كە لە كۆتایی دیمانەكەیدا ووتی: بۆم دەركەوت كە ئەم بەڵگانەی محمد كوڕی عەبدوڵڵا هێناونی لەلایەن خواوەیە، ئەمەش بۆم ئەسەلمێنێ‌ كە (محمد) پێغەمبەری خوایە.
دیمانەی دووەم: لەبارەی ئیعجازی قورئانەوەیە لە روونكردنەوەی ناوەندی هەستكردن بە ئازار لە پێستدا لە گەڵ پرۆفیسۆر (تاجاتات تاجاسون) كە لەكۆتاییدا شایەتومانی هێنا و موسوڵمان بوو.
دیمانەی سێهەم: لە زانستی جیولوجیدایە لەبارەی دروستبوونی تەنە ئاسمانییەكانەوە بوو لەگەڵ پرۆفیسۆر (كرۆنر).
دیمانەی چوارەم: لەبارەی باسی قۆناغەكانی كۆرپەلەوەیە لە قورئانی پیرۆزدا لەگەڵ پرۆفیسۆر (مارشال جۆنسۆن)دا، لە كۆتایی دیمانەكەیدا دەڵێت: دەستی توانای پەروەردگار بەگشتی بەهەموو شتێكەوە دیارە.
دیمانەی پێنجەم: لەبارەی هەماهەنگی دۆزینەوە گەردوونییەكانەوەیە لەگەڵ هەواڵە قورئانییەكاندا لەگەڵ پرۆفیسۆر (یۆشیهیدی كۆزای)دا، كە لە كۆتایی دیمانەكەی ووتی: بەدڵنیایییەوە دۆزینەوەی هەقیقەت لە قورئاندا زۆر كاری تێكردووم.
دیمانەی شەشەم: لەبارەی ئیسلام و زانستەوە بوو لەگەڵ پرۆفیسۆر (جولی سیمسۆن) كە ووتی: باوەڕم وایە كە نەك هیچ ناكۆكییەك لەنێوان زانست و سرووشدا (وحی) نییە بەڵكو سرووش پشتی هۆكارەكانی دۆزینەوەی زانستیی دەگرێـت.
دیمانەی حەوتەم: چەند راستییەك بوو لە بارەی دەریا و ئۆقیانووسەكانەوە لەگەڵ پرۆفیسۆر (ولیام دەبلیو های) كە لەكۆتاییدا لەبارەی دەقی قورئانییەوە ووتی: باوەڕم وایە و بێگومانم كە لەلایەن خواوەیە.
دیمانەی هەشتەم: لەبارەی كۆرپەلەوە بوو لەدوای رۆژی (42)هەمەوە و دەركەوتنی نەخۆشی خراپ بەدەركەوتنی كاری خراپەكاری لەگەڵ پرۆفیسۆر (پێرسود) كە لە كۆتایی دیمانەكەیدا وتی: بەلامەوە گران نییە كە بە عەقڵم قبوڵی ئەوە بكەم كە ئەمە ئیلهامێكی خوایییە، یان (سرووش) بۆتە هۆی دەرخستنی ئەم مەسەلانە.
دیمانەی نۆهەم: لەبارەی چەند هەواڵیكی گەردوونی و جوغرافییەوە بوو لەگەڵ (د. پالمار).
دیمانەی دەهەم: لەبارەی باسی چیاكانەوە بوو لە قورئانی پیرۆزدا لەگەڵ پرۆفیسۆر (سیاویدا)دا.
دیمانەی یانزەهەم: كەهەندێك راستی گەردوونناسی لەخۆگرتبوو لەگەڵا پرۆفیسۆر (ئارمسترۆنگ)دا.
دیمانەی دوانزەهەم: لەبارەی قۆناغەكانی كۆرپەلەوە بوو لەگەڵ پرۆفیسۆر (گۆرینگەر)دا.
دیمانەی سیانزەهەم: لەبارەی قووڵایی دەریا و ئۆقیانووسەكانەوە بوو لەگەڵ پرۆفیسۆر (راو)دا.
لەكۆتاییدا دیمانەی چواردەهەم دێت لەبارەی دیاردە دەریایییەكانەوە بوو لە نێوان دۆزینەوە زانستییەكان و ئایەتەكانی قورئاندا لەگەڵ پرۆفیسۆر (شرۆیدەر), لە كۆتایی دیمانەكەدا ووتی: ئەوەی چەندەها ساڵ لە قورئانی پیرۆزدا ووتراوە راستییەكە كە ئێستا زاناكان دەیدۆزنەوە، بۆیە من باوەڕم وایە و لام گرنگە ئەم راستییانە بگەینرێنە زانایانی هەموو میللەتە جیاجیاكان، چونكە لە زۆر ئاینی تردا دەبیستی كە سەركردەكانیان وا دەزانن ئەگەر هەر كاتێك زانست پێش بكەوێت ئەوا ئەبێت ئایین بچێـتە دواوە، كەچی ئەم قسەیە لە بۆچوونی قورئاندا بەتەواوەتی پێچەوانەیە.
ئەم قورئانە زیندووەی كە لە بەردەستماندایە لەهەموو چەرخەكاندا تیشك ئەداتەوەو، بەراستییەكانی ناویشی زانایانی بوونەوەرناسی ئەمڕۆی لە بوارە جیاجیاكاندا سەرسام كردووە، ئەویش پاسەدانی فەرموودەیەكی خوایییە كە دەڵێت: (سَنُڕیهِمْ اێاتِنَا فِی الا‌فَاقِ ۆفِی أَنْفُسِهِمْ حَتَّی ێتَبَیَّنَ ڵهُمْ أَنَّهُ الْحَقُّ أَۆڵمْ ێكْفِ بِرَبِّكَ أَنَّهُ عَڵی كُلِّ شَیْ‌ء شَهِیدٌ) (فصلت:53) .